Australia News : ਆਸਟ੍ਰੇਲੀਆ ਸਰਕਾਰ ਆਏ ਦਿਨ ਨਵੇਂ ਨਿਯਮਾਂ ਨੂੰ ਲੈ ਕੇ ਚਰਚਾ ‘ਚ ਬਣਿਆ ਹੋਇਆ ਹੈ। ਇਸ ਵਿਚਾਲੇ ਹੁਣ ਆਸਟਰੇਲੀਆ ਦੀ ਸੰਘੀ ਸਰਕਾਰ ਨੇ ਅੱਜ ਇਕ ਨਵ-ਨਾਜ਼ੀ ਆਨਲਾਈਨ (Online) ਸਮੂਹ ਵਿਰੁਧ ਪਾਬੰਦੀਆਂ ਲਗਾ ਦਿੱਤੀਆਂ ਹਨ, ਜੋ ਹਿੰਸਾ ਦੀਆਂ ਕਾਰਵਾਈਆਂ ਦਾ ਖੁੱਲ੍ਹ ਕੇ ਸਮਰਥਨ ਕਰਦਾ ਹੈ। ਅਸਲ ਵਿਚ ਆਸਟਰੇਲੀਆ ਨੇ ਯਹੂਦੀ ਵਿਰੋਧੀ ਹਮਲਿਆਂ ਪ੍ਰਤੀ ਅਪਣੀ ਪ੍ਰਤੀਕਿਰਿਆ ਨੂੰ ਤੇਜ਼ ਕਰਦੇ ਹੋਏ ਵਿਦੇਸ਼ ਮੰਤਰੀ ਪੈਨੀ ਵੋਂਗ ਨੇ ਗੋਰੇ ਸਰਵਉਚਤਾਵਾਦੀ ਅਤਿਵਾਦੀ ਨੈੱਟਵਰਕ ਟੈਰਰਗ੍ਰਾਮ ਵਿਰੁਧ ਅਤਿਵਾਦ ਵਿਰੋਧੀ ਵਿੱਤ ਉਪਾਵਾਂ ਦਾ ਐਲਾਨ ਕਰ ਦਿੱਤਾ ਹੈ। ਇਹ ਪਹਿਲੀ ਵਾਰ ਹੈ ਜਦੋਂ ਸਿਰਫ਼ ਆਨਲਾਈਨ ਅਧਾਰਤ ਕਿਸੇ ਸੰਗਠਨ ਨੂੰ ਆਸਟਰੇਲੀਆਈ ਸਰਕਾਰ ਵਲੋਂ ਅਤਿਵਾਦ ਵਿਰੋਧੀ ਵਿੱਤੀ ਪਾਬੰਦੀਆਂ ਦਾ ਸਾਹਮਣਾ ਕਰਨਾ ਪਿਆ ਹੈ।
ਇਹ ਵੀ ਪੜ੍ਹੋ : ਟਰੂਡੋ ਨੇ ਟਰੰਪ ਨੂੰ ਮੋੜ੍ਹੀ ਭਾਜੀ, Canada ਨੇ ਅਮਰੀਕਾ ‘ਤੇ ਲਗਾਇਆ 25% ਟੈਰਿਫ
ਪੈਨੀ ਵੋਂਗ ਨੇ ਕਿਹਾ,‘ਟੈਰਰਗ੍ਰਾਮ ਇਕ ਆਨਲਾਈਨ ਨੈੱਟਵਰਕ ਹੈ ਜੋ ਗੋਰੇ ਸਰਵਉਚਤਾ ਅਤੇ ਨਸਲੀ ਤੌਰ ’ਤੇ ਪ੍ਰੇਰਿਤ ਹਿੰਸਾ ਨੂੰ ਉਤਸ਼ਾਹਤ ਕਰਦਾ ਹੈ। ਟੈਰਰਗ੍ਰਾਮ ਦੀਆਂ ਸੰਪਤੀਆਂ ਦੀ ਵਰਤੋਂ ਕਰਨਾ ਜਾਂ ਉਨ੍ਹਾਂ ਨੂੰ ਉਪਲਬਧ ਕਰਾਉਣਾ ਹੁਣ ਇਕ ਅਪਰਾਧ ਹੈ।’ ਜੁਰਮਾਨਿਆਂ ਵਿਚ 10 ਸਾਲ ਤਕ ਦੀ ਕੈਦ ਅਤੇ ਭਾਰੀ ਜੁਰਮਾਨੇ ਸ਼ਾਮਲ ਹਨ। ਵੋਂਗ ਨੇ ਕਿਹਾ ਕਿ ਹਿੰਸਕ ਨਸਲਵਾਦੀ ਅਤੇ ਰਾਸ਼ਟਰਵਾਦੀ ਵਿਚਾਰਧਾਰਾਵਾਂ ਨੂੰ ਉਤਸ਼ਾਹਿਤ ਕਰਨ ਵਾਲੇ ਚਾਰ ਹੋਰ ਸਮੂਹਾਂ ਨੈਸ਼ਨਲ ਸੋਸ਼ਲਿਸਟ ਆਰਡਰ, ਰਸ਼ੀਅਨ ਇੰਪੀਰੀਅਲ ਮੂਵਮੈਂਟ, ਸੋਨੇਨਕ੍ਰੀਗ ਡਿਵੀਜ਼ਨ ਅਤੇ ਦ ਬੇਸ ਨੂੰ ਵੀ ਅੱਤਵਾਦ ਵਿਰੋਧੀ ਵਿੱਤੀ ਪਾਬੰਦੀਆਂ ਲਈ ਦੁਬਾਰਾ ਸੂਚੀਬੱਧ ਕੀਤਾ ਗਿਆ ਹੈ।
